Serikali kukabiiana na vitendo vyote vitakavyoashiria uvunjifu wa amani

 

STATE HOUSE ZANZIBAR

OFFICE OF THE PRESS SECRETARY

PRESS RELEASE

Zanzibar                                 24.9.2015

SERIKALI ya Mapinduzi ya Zanzibar na Serikaili ya Jamhuri ya Muungano wa Tanzania zitaendelea kukabiliana na wale wote watakaofanya vitendo vitakavyoashiria kutaka kuvunja amani ya nchi wakati wote hasa katika kipindi hiki cha Kampeni za Uchaguzi Mkuu,wakati wa uchaguzi na baada ya uchaguzi.

Rais wa Zanzibar na Mwenyekiti wa Baraza la Mapinduzi Alhaj Dk. Ali Mohamed Shein aliyasema hayo leo katika hotuba yake ya Baraza la Idd al Hajj aliyoitoa huko katika ukumbi wa Chuo cha Amali Mkokotoni, Mkoa wa Kaskazini Unguja.

Alhaj Dk. Shein aliwahakikishia wananchi kuwa hakuna atakayeonewa au kudhulumiwa kwa njia yoyote ile lakini ni vizuri wajue kuwa Serikali ina wajibu wa Kikatiba wa kuwalinda watu wote na mali zao pamoja na wageni wanaoitembea Zanzibar.

Aidha, Alhaj Dk. Shein alitumia fursa hiyo kuwakumbusha viongozi wa kisiasa, kijamii na wa madhehebu ya dini kuwasisitiza wafuasi wao umuhimu wa kuilinda amani na kujiepusha na vitendo vyote vitakavyoweza kuondoa amani na utulivu uliopo.

“Nimekuwa nikisema mara kadhaa kuwa amani haina mbadala. Bila ya amani hatuwezi kupata maendeleo yoyote”,alisisitiza Alhaj Dk. Shein.

Alhaj Dk. Shein alisema kuwa kutokuwepo kwa amani kunahatarisha uhai wa watu na ni sababu ya kuharibu miundombinu ya aina mbali mbali na kuzua fadhaa kwa jamii.

Aliendelea kueleza kuwa kutokuwepo kwa amani huwaondolea wasaa hata waumini katika kutekeleza ibada za kumuabudu Mola wao.

Pamoja na hayo, Alhaj Dk. Shein alisema kuwa Serikali imeanza kazi ya kufanya upembuzi yakinifu ili kuanzisha Mfuko wa Hijja Zanzibar kwa lengo la kuwasaidia wananchi wengi zaidi waweze kupata fursa ya kuitekeleza ibada ya Hijja kwa wepesi na mapema zaidi.

Alisema kuwa Mfuko utakapoanzishwa watu wengi zaidi watapata nafasi na uwezo wa kuweka fedha kidogo kidogo kwa mujibu wa uwezo wao na hatimae watamudu kutekeleza ibada za Hijja na Umra kwa mujibu wa makubaliano na taratibu zitakazowekwa na Mfuko.

Aidha, Alhaj Dk. Shein alieleza kufarajika kwake na hatua kubwa ya maendeleo iliyofikiwa katika Mkoa wa Kaskazini Unguja katika sekta za kiuchumi, huduma za jamii na muamko wa wananchi katika kuzitumia fursa mbali mbali za kujiendeleza kiuchumi kwa kushirikiana na serikali.

Alhaj Dk. Shein alisema kuwa katika kuhakikisha kuwa Mikoa inazidi kuimarika kiuchumi, kuongeza fursa za ajira hasa kwa vijana na kuimarisha upatikanaji mzuri wa huduma za jamii, Serikali imeazimia kujenga mji wa kisasa katika Mkoa huo kwenye vijiji vya Matemwe na Kijini.

Pia, alisema kuwa ujenzi wa barabara wenye urefu wa kilomita 20.2 kutoka Matemwe kupitia Kijini hadi Kidoti umekwishaanza.

Sambamba na hayo, Dk. Shein alisema kuwa wananchi wengi wa maeneo ya Bumbwini, Mkokotoni, Bwekunduni, Fungurefu na vijiji vyengine vya Mkoa huo wameimarisha uchumi wao kwa kujishughulisha na biashara ya madagaa ambayo husafirisha hadi Kongo na nchin nyengine  Jirani.

Akieleza mafanikio yaliofikiwa katika kuimarisha upatikanaji wa huduma ya maji safi na salama katika Mkoa huo Alhad Dk. Shein alisema kuwa upatikanaji wa  huduma hiyo imefikia asilimia 71.68.

Alisema kuwa mafanikio hayo yamefikiwa baada ya kutekeleza miradi mikuu mitatu ya maji safi na salama katika Mkoa huo ukiwemo Mradi wa Serikali kupitai Mamlaka ya Maji Zanzibar (ZAWA), Mradi wa Ras-al-Khaiman na ADB.

Kadhalika Alhaj Dk. Shein alisema kuwa Serikali imeimarisha huduma za hospitali ya Koteji ya Kivunge pamoja vituo vya afya vyengine katika Mkoa huo ili kuziimarisha afya za wananchi.

Alhaj Dk. Shein alitumia fursa hiyo kuzitaka taasisi zinazoshughulikia usafi wa miji ziongeze kasi katika kusafisha misingi ya maji machafu na njia za maji na usafi wa mazingira  ili kuepukana na mardhi katika kukabiliana na mvua za vuli zijazo ambapo kwa mujibu wa Mamlaka ya Hali ya Hewa upo uwezekano wa kuwepo mvua kubwa za ‘El-Nino’.

Pia, Dk. Shein aliwanasihi wananchi kuacha kujenga katika sehemu za mabonde na wote wawe na moyo wa kusaidiana wakati wote, hsa pale Mwenyezei Mungu anapoleta mitihani mabali mbali.

Aidha, Alhaj Dk. Shein aliutaka uongozi wa Mkoa wa Kaskazini Unguja kwa kushirikiana na Jeshi la Polisi pamoja na taasisi zinazowasimamia madereva wachukue hatua madhubuti katika kukabiliana na tatizo la ajali za barabarani katika Mkoa huo.

Mapema Alhaj Dk. Shein aliungana na wananchi katika Sala ya Idd-El-Hajj huko Katika uwanja vya Mpira Mkokotoni ambapo viongozi mbali mbali walihudhuria katika ibada hiyo pamoja na Baraza la Idd akiwemo Makamu wa Kwanza wa Rais Maalim Seif Sharif Hamad, Makamu Pili Balozi Seif Idd na viongozi wa dini, siasa, Serikali pamoja na wananchi.